سریزه: کرنيز محصولات  په خاصه توگه د ميوه جاتو د کيميت او کيفيت  لوړولو په برخه کې د نباتي هورمونونو پيژندل ډير د اهميت وړ دي .بدون له شکه د نباتاتو وده د تيغ وهنى څخه تر  مړينى پورى د غذائى موادو په شمول  د نباتي  هورمونونو  تر کنترول  لاندې  قرار  لرى . نباتي هورمونونه ډير کم مقدار ددې وړتيا لري چې د نبات  وده ايز فعاليتونه  له  تيغ وهنې څخه د ژوند تر اخرنى مرحلې پورې تنظيم کړي .هورمون  د  يونانى  لغات   د   Hormonea څخه   مشتق  شوي  دى  چې  د  تحريکوونکې  يا  پارونکې   معنا ورکوي او هغه طبيعي خا صو موادو ته چې کنترول کوونکې عمل په نباتاتو کې ترسره کړى هورمون ويل کيږي ، نو پدې اساس هورمونونه عضوي مرکبات دي  چې د نباتاتو په داخل کې جوړيږي او په  کم غلظت سره خاص فزيالوجيکې فعاليتونو ته تبارز ورکوي . نباتي  هورمونونه  په  طبيعي  ډول  په  نباتاتو كې جوړيږي او  په  مصنوعي  ډول  هم  رامنځته کيږي . د شپيتو څخه زيات کلونه کيږي چې د نباتي وده کوونکو موادو لمړنې گروپ يعنى اكسيجنونه کشف شول .د نوموړو مرکباتو څخه استفاده په زراعت کې د نباتاتو په ځينو فزيالوجيکې فعاليتونوکې ډير د اهميت وړدي، او نن ورځ ددي موادو مصنوعي مشتقاتو څخه دخاصو اهدافو ته د رسيدو په خاطر استفاده کيږي د نباتاتو وده ايز فصل په اوږدوكې د هورمونونواندازه  په نباتاتو كې تغير مومي،د هورمونونو فعاليتونه د يو توازن په ډول په نباتاتو كې سرته رسيږي،كله د يو هورمون  فعاليت زيات شي او كله دبل  هورمون فعاليت زيات شي . د يو با تعادله او با ثباته وده چې د ودې ښه کوونکې او ودې مخه نيوونکې هورمونونو تر مينځ د اړيکو تنظيم څخه عبارت دى  چې په نتيجه کې د نباتاتو بقا يا پايښت سبب گرځي .