سریزه: بشري پرمختگ او لاسته راوړنې د وخت په اوږدو کې د تخنيکي مهارتونو په اساس رامنځته شوي دي. که مونږ لږ څه وړاندي فکر وکړو نو دا به راته  جوته شي چې د اقتصادي پرمختگ په پړاونو کې  تکنالوژي څومره اهميت او رول درلوده. د صنعتي انقلاب څخه وروسته د نړۍ په مختلفو سيمو کې اختراعات او کشفيات رامنځته شول .لکه،د بخارماشين ،د حمل اونقل وسايل ،بحري لارې , ترانسپورت او داسې نور د وخت په اوږدو کې دغه اختراعاتو,کشفياتواوتکنالو‌‌ژيکي تغيراتو په برخه کې زياتوالی او سرعت رامنځته شوو.  چې په دې برخه کې ځينوملکونو زيات پرمختگ وکړاو ځينوملکونو د مختلفوعواملو په اساس ونشوکولای چې خپل اقتصاد ته پرمختيا ورکړي .همدا رازد شلمې پيړۍ په اوږدو کې تکنالو‌‌ژۍ دومره پرمختگ وکړ چې بشر يې د ژوند يو نوي پړاو ته داخل کړ. د تخنيکي مختلفو وسايلو پرمختگ په مختلفو ساحو کې زيات تحول رامنځته کړ لکه د تيز رفتاره ترانسپورت په رامنځته کيدو سره تجارت زياته وده وکړه همدا رنگه د کمپيوتر،انترنيټ اونورو ارتباطي وسايلوهم په دې برخه کې دومره آسانتياوې رامنځته کړې چې په آساني سره يي تصورکول هم گران دي .  په دې ترتيب د تخنيکي اوفني ظرفيتونوپه زياتيدو سره چې تکنالو‌‌ژيکي تغيرات يي اساس جوړوي د يوهيواد د ملي اقتصاد ټولو سکتورونو ته زياته پرمختيا په برخه کړه. د زراعت لپاره ډيرزيات ماشين آلات ،د آفاتو د مخنيوي دواگانې،کيمياوي سرې اواصلاح شوي تخمونو په رامنځته کيدو سره د زراعتي محصولاتو توليد کې څو چنده زياتوالی راغی چې د غله جاتونړيوال مارکيتونوهم پراختيا وموندله .همدا رنگه د صنعتي مختلفو اقلامو په رامنځته کيدوسره داخلي او خارجي بازارونو پراختيا پيداکړه اوهمدا رنگه داخلي او نړيوالي سوداگرى سطحې يو پرمختللی شکل ځانته غوره کړ اوهم يي سرعت او پراختيا پيداکړه.  په مجموع کې تکنالو‌‌ژۍ د اقتصادي پرمختيا په برخه کې ډيرچټک تحول رامنځته کړی چې ويلای شو پرته د تکنالوژۍ څخه اقتصادي پرمختگ يو ناشونې کاردى. که چيرته مونږ خپل چاپيريال ته نظر واچوو نو وبه گورو چې دغه چاپيريال کې ټول اجناس اوخدمات د تکنالو‌‌ژۍ له برکته رامنځته شوي.په دې اساس د نوې تکنالو‌‌ژۍ ډيرچټک پرمختگ نړي سره داسې نښلولې چې اوس يې د يو کلي شکل غوره کړي اوهرڅوک کولای شي چې په څودقيقو کې دنړۍ دهرگوټ څخه ځان خبرکړي. تکنالو‌‌ژيکي پراخه تغيرات د اقتصادي پرمختيا د اصلي عامل په توگه شمارل کيږي.